Cwynion y gallwn helpu yn eu cylch

Gallwn helpu â chwynion am y gwasanaeth a roddir gan gwmnïau rheoli hawliadau (CMCs).

Gallwn wneud hyn hyd yn oed os oedd y CMC wedi’ch cynrychioli i gyflwyno cwyn am fusnes ariannol i’r Gwasanaeth Ombwdsmon Ariannol.

Pan fyddwch yn cysylltu, byddwn yn eich hysbysu os yw’r CMC yn un a gynhwysir gennym, ac os yw’r gŵyn am rywbeth y gallwn  ymchwilio iddo.

Gallwn fel arfer edrych ar gwynion am CMCs:

• sy’n darparu eu gwasanaethau o Loegr, Yr Alban a Chymru neu i gwsmeriaid yn y gwledydd hyn
• a awdurdodir gan yr Awdurdod Ymddygiad Ariannol (FCA)

Mae hyn yn cynnwys CMCs sy’n trafod hawliadau am:

• anaf troseddol (anafiadau personol o ganlyniad i drosedd)
• cyflogaeth (er enghraifft, diswyddo annheg)
• cynnyrch a gwasanaethau ariannol
• diffyg atgyweirio tai (er enghraifft, pan fyddwch wedi dweud am atgyweiriadau wrth eich landlord ac nid ydynt wedi gwneud dim amdanynt)
• anaf diwydiannol (hawliadau am fudd-daliadau os cawsoch eich anafu mewn damwain yn y gwaith)
• anaf personol

Gallwn hefyd edrych ar gwynion ynghylch sut mae CMCs yn dod o hyd i gwsmeriaid sydd â hawliadau posibl yn y meysydd hyn (er enghraifft, trwy alwadau ffôn na ofynnwyd amdanynt).

A gallwn edrych ar gwynion am CMCs a oedd yn cael eu cynnwys gan yr Ombwdsmon Cyfreithiol ar adeg y digwyddiad y mae eich cwyn amdano.

Gallwn eich helpu os yw’ch cwyn am y gwasanaeth rydych wedi’i dderbyn gan CMC.

Gallai fod yn sefyllfa lle rydych yn tybio:

• nad oedd y CMC wedi esbonio’n eglur:
  • pa ffioedd y byddent yn eu codi cyn iddynt ymrwymo i gytundeb â chi
  • unrhyw newidiadau i’r ffioedd yn ystod cyfnod y cytundeb â chi
• nad oeddent wedi’ch hysbysu am gynnydd eich hawliad
• eu bod wedi achosi oedi diangen i gynnydd eich hawliad
• eu bod wedi rhoi cyngor amhriodol neu anghywir ynghylch hawliadau
• eu bod wedi methu â dilyn eich cyfarwyddiadau
• nad oeddent bob amser yn ymateb pan oeddech yn cysylltu â nhw
• eu bod wedi trosglwyddo eich hawliad i CMC arall heb ddweud wrthych
• eu bod wedu cysylltu â chi dro ar ôl tro heb eich caniatâd

Os ydych wedi derbyn gwasanaeth gwael gan CMC, gallwn helpu i unioni pethau.   Ond ni allwn edrych ar neu newid canlyniad eich hawliad gwreiddiol –er enghraifft, penderfyniad tribiwnlys cyflogaeth i wrthod eich hawliad am ddiswyddo annheg.

Gallwn eich helpu gyda’ch cwyn os ydych yn:

• ddefnyddiwr unigol – neu ddefnyddwyr ar y cyd
• ‘microfenter’ (busnes gyda throsiant blynyddol o lai na €2 filiwn a llai na deg o gyflogeion)
• busnes â throsiant blynyddol o lai na £6.5 miliwn, a naill ai llai na 50 o gyflogeion neu fantolen o lai na £5 miliwn
• elusen gydag incwm blynyddol o lai na £6.5 miliwn
• ymddiriedolwr ymddiriedolaeth sydd â gwerth ased net o dan £5 miliwn

Cyn i chi ddod atom, bydd angen i chi fod wedi rhoi’r cyfle i’r CMC ddatrys y broblem. Mae ganddynt hyd at wyth wythnos i gyflwyno eu hymateb terfynol i’ch cwyn. Bydd angen i chi wedyn gysylltu â ni o fewn chwe mis i ddyddiad llythyr ymateb terfynol y CMC.

Mae’n bosibl y bydd terfynau amser eraill sy’n ymwneud â’ch cwyn – dysgu mwy am derfynau amser.

Mae ffiniau ynghylch y swm y gallwn ddweud wrth CMC i dalu i chi. Dysgu am iawndal – sut rydym yn ei gyfrifo, a beth yw’r ffiniau.

Gallwn fel arfer edrych ar gwynion am CMCs:

• sy’n darparu eu gwasanaethau o Loegr, Yr Alban a Chymru neu i gwsmeriaid yn y gwledydd hyn
• a awdurdodir gan yr Awdurdod Ymddygiad Ariannol (FCA)

Os nad ydych yn byw yn Lloegr, yr Alban neu Gymru ac rydych yn dymuno gwneud cwyn am CMC sydd â chanolfan y tu allan i’r gwledydd hyn, mae’n bosibl y gallech gael help gan gorff trafod cwynion cyfatebol.  Yng Ngogledd Iwerddon, mae’r rheolau’n wahanol. Os ydych chi yng Ngogledd Iwerddon, neu’n delio â CMC wedi’i leoli yno, rhowch wybod i ni. 

Cysyltwch â ni a byddwn yn ceisio eich helpu i gyfeirio eich cwyn at y sefydliad cywir.

Mae’n bosibl y ceir rhesymau pam na allwn eich helpu â chwyn. Er enghraifft, ni fyddwn fel arfer yn trafod cwyn am CMC rydym ni neu’r Ombwdsmon Cyfreithiol wedi edrych arni’n barod.

Weithiau ni allwn helpu oherwydd y trafodir eich cwyn yn well gan sefydliad neu wasanaeth arall.  Os na allwn helpu, byddwn yn ceisio dweud wrthych pwy sy’n gallu.

Os na fyddwch yn siŵr a allwn helpu gyda’ch cwyn, neu fod cwestiynau eraill gennych, ffoniwch ni ar 0800 023 4567.

Gallwch hefyd ddysgu mwy am sut i gysylltu os oes gennych anghenion hygyrchedd.